ياظريف الطول من تراثنا الجميل تغنى به الفلاح والبدوي وابن المدينه تغنو ا به الثوار ايام حرب فلسطين

يا ظريف الطول وين اهلك غدو

ع جبل حوران شالو وابعدو

يا مين يبشرني ويقولي عاودو

ياخد فدانين مع فلحة سنة


يا ظريف الطول يا عين العنبري

والبنات رخاص التسعة بوزَرِ

يلله يا عزب اتقلّب واشتري

منديل راحة والسعر مبينا


يا ظريف الطول ملا انت ظريف

ما عذب القلب الا الخد النظيف

يا مين يحب الله ويعطيني رغيف

رغيف المحبوب بيكفيني سنة
\

يا ظريف الطول يا عين العنكبوت

قفلو علية الباب من وين افوت

ما بفوت الحلوة حتى لو بموت

لو حطو في قليبي بارودة مكبسنة



يا ظريف الطول طولك بعرفو

ما تبوسش خدي يا نذل تقرفو


يا ظريف الطول ماشي قلنقوز

يا حزام البنت في حزام العجوز

لاروح للحاكم اقولو ما بيجوز

حزّمها بتلفون واحكمها بسنة



يا ظريف الطول ويا حلو الحلو

وحامل القربة على الصلب الحلو

بالله يا بنت اسقيني من الدلو

كلو على حسابك يا إبن بلادنا


يا ظريف الطول ويا مشمل شمال

ياللي طولك مع نسيم الهوا مال

ساق الله يالمحبوب تاكنّا جهّال

تا كنا في الدار نواجه بعضنا

ياظريف الطول ومحمل عناب

والشعر الاشقر لحد الكعاب

بالله يامحبوب تبعث لي مرسال

وتيجيني ع الدار واللا اجيك انا


يا ظريف الطول طالع سلّمو

من عنين الناس ربي يسلّمو

مضيت العمر وانا بعلمو

قدام الخلق لا تيجي دارنا

يا ظريف الطول فش احلى منك

يا كحيل العين بدي غرض منك

جرحت قلبي وبضحك سنك

يا بو عيون السود مقابل دارنا


يا ظريف الطول مشيك دلع ليش

يا كحيل العين هالبغضة عليش

لو سقوني المر بعد المر شيش

لا غنى عن شوف حبابي لا غنى


يا ظريف الطول ع عين العلق

والعنق شبرين وهيك الله خلق

حلوة مليحة لو لبست خلق

واشحال لو تلبس هدوم الولدنة


يا ظريف الطول مر وما التفت

ولعت نارو بقلبي ما انطفت

وان كان يا ولفي ها العشرة جفت

لا بارك الله في عشرة غيرنا


يا ظريف الطول يا عيني اليمين

قولّي يا حبيبي بعدي تهوى مين

يالله يا ابن العم تانحلف يمين

ما حد يخش الدار غير أنت وأنا

ملاحظة

مضمون المقالات، المقابلات، أو الافلام يعبر عن الرأي الشخصي لمؤلفها وفلسطين في الذاكرة غير مسؤولة عن هذه الآراء. بقدر الامكان تحاول فلسطين في الذاكرة التدقيق في صحة المعلومات ولكن لا تضمن صحتها.

   

شارك في تعليقك أي تعليقات مؤذية، تهجمية، أو متعالية على الآخرين ستحذف فوراً. الرجاء كتابة تعليقات متواضعة، وإذا كان عندك إنتقاد فإجعله بناء. الأسم البريد الألكتروني* اللغه عربي إنجليزي يرجى الملاحظة اننا نحذف أي تعليق يحتوي على روابط. *يرجى الملاحظه باننا لا نشارك  بريدك الألكترونى مع زوار الموقع على الأطلاق وكل المراسلات تتم من خلال الموقع.

 

الجديد في الموقع