من فلسطيني في نضرة العالم
فلسطيني ممنوع تعيش

فلسطيني ممنوع تعيش
قالولك اسكت ما تحكيش
انت خلقت للتلطيش
للحواجز للمعابر للتفتيش
كتبوا على جبينك ينداس
من الضابط للشاويش
فلسطيني قالولك ممنوع تعيش
فلسطيني ممنوع تثور
و مسموح ع الاخر تكون مقهور
اياك تطالب بحقك
أوعك بيوم تشوف النور
***
ممنوع تجدد هويه
ممنوع تجدد بسبور
فلسطيني و بدك تتعلم
هاي الشغله ضد الدستور
فلسطيني لازم تتألم
من دون ما يشوفك دكتور
فلسطيني ممنوع تتظلم

فلسطيني ممنوع تعيش

***
فلسطيني بكل المطارات
اسمك بالاحمر مكتوب
و على شباك مصلحه الجوازات
كتبوا على جبينك مطلوب
لازم تتوقف ساعات
مذنب أو مندون ذنوب
و يتوجه الك اتهامات
انت سبب كل الحروب
كأنو بسببك الحق مات
و العدل بأرضك مسلوب
و كأنك سبب النكسات
و كل أزمات الشعوب
و كأنو بسببك مجرم فات
على جنين بلحظه الغروب
و دبح صبيان و بنات
و عجز على امرها مغلوب

***
مع انو الحقيقه
أنا اللي بالدنيا ضحيه
عملتوني ماده للغنى
و قضية للي ما عندو قضيه
أنا اللي راسي ما إنحنى
بوجه الريح القويه
أنا اللي شعبي صمد
في الضفه و بالرشيديه
انا الي شعبي انتفض
وبحجر حارب دوريه
و اليوم و بكره و للابد
عنا كلمه وحده هي

***
فلسطين عربيه
و راح تبقي عربيه
و راح ترجع عربيه mohammd sadaqa \رابط قرية المديه على الفيس بوك الجديد http://www.facebook.com/group.php?gid=119941477381

ملاحظة

مضمون المقالات، المقابلات، أو الافلام يعبر عن الرأي الشخصي لمؤلفها وفلسطين في الذاكرة غير مسؤولة عن هذه الآراء. بقدر الامكان تحاول فلسطين في الذاكرة التدقيق في صحة المعلومات ولكن لا تضمن صحتها.