الزيب: عائد الى الزيب - كتابة (مجدي الطه)

"عائد الى الزيب"
(وقف موسى امام باب بيتهم بالزيب من بعد طول غياب...)

يمما! وينك يمما!!
مافي حدن بالبيت؟

انا موسى يمما!
رجعت من سفر برلك مشي مش بالترين

وين شجرة التينة والزيتونة!
والتوتة والليمونة!
وكمان غيرتوا لون باب البيت!!
وينك يمما! انا موسى
مافي حدن بالبيت؟

وين دار اخوي محمود يللي حد معصرة الزيت
وين القهوة وإمام المسجد ومبنى العين
يمما وينك !
مافي حدن بالبيت؟

وين راحت الحاكوره وحوض البندورة
وشتلات الرمان والليمون
يمما وينك !
مافي حدن بالبيت؟

وين دار الافندي والبخشة والناعورة
وليش بيت المختار مسيّج ومسكره طريق الناقورة
يمما وينك !
مافي حدن بالبيت؟

وين دكان أبوي وعمي ابو شاكر
يللي على طريق العين لصوب البيادر
وين دار جدي ابو توفيق وعمتي سَميّة
يللي على طريق تحت المنزول للحارة الغربية
يمما وينك !
مافي حدن بالبيت؟

وين خالي فارس اللي بحب الخُبّيزة
يللي داره لصوب الطريق العام عند الجُمّيزة
يمما سمعتيني!! انا موسى
ما في حدن بالبيت؟

وين راحوا أهل الحارة القبلية والرمل وأهل حارتنا
وكيف اختفت كل البيّارات وكمان بيّارتنا
وينك يمما! !
مافي حدن بالبيت؟؟

(مجدي طه محمد مصطفى الشيخ طه 2015)
‫#‏عائدون‬
‫#‏الزيب‬ ‫#‏عكا‬ ‫#‏فلسطين‬