طولكرم: يا هلا و حيّاك . انت بطولكرم

الأغنية السادسة لي في هذا الموقع والثالثة لمحافظة طولكرم.
تمتاز تلك الاغنية بانها تذكر جميع قرى وضواحي طولكرم التابعة لمحافظة طولكرم حاليا (منطقة السلطة الفلسطينية)
اما بالنسبة للقرى المهجرة او المدمرة او المستعمرة فتلك لها تصنيف اخر طويل لايتسع المجال له في تلك الاغنية

القرى والضواحي المهجرة والمدمرة منها ما اقيم على اراضيها مستوطنات ومنها ما لايزال مأهول بالسكان ولكن تحت سيطرة الاحتلال في اراضي ال48
مثل زلفة والجلمة وقاقون وبيارات حنون والمنشية ورملة زيتا (قزازة) ووادي الحوارث ووادي قباني وام خالد(نتيانيا) وغابة كفر صور ومسكة وفرديسيا وقلنسوة وطيبة المثلث وطيرة بني صعب (طيرة المثلث). وبجوار كل مدينة او قرية يوجد عزب زراعية وخرابات اثرية بالعشرات وضواحي كبيرة ايضا بحجم القرى لذلك فالقائمة طويلة جدا. وعموما تفاصيل جميع مناطق طولكرم تجدونها على هذا الرابط في موقع فلسطين في الذاكرة:
https://www.palestineremembered.com/ar/TulkarmTownsSnapshot.html

...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
طولْكَرِمْ بِالعِين وْبِالقَلِبْ وِالرُّوحْ
إِتْنَقَّلْ مِنْ قَلبِيْ لَعِينِي وِانْسَجِمْ
....
ياَطِيْر الطَّايِرْ مَيِّلْ عَلى طولْكَرِمْ
وِابْنِ عِشَّكْ بِالبَيّارةْ وْبِالكَرِمْ
وْعَالأشْجَارِ الِّليْ مَابِين بْيُوت النَّاسْ
إِتْنَقَّلْ مِنْ حارَةْ . لَ حارَةْ . وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
رَفْرِفْ فُوق الخُضُوريْ الكَنْز الثَّمِينْ
أَوّلْ مَعهَدْ زِراعِيْ فِي فَلَسْطِينْ
خُضْرَةْ وْمَيّْ وْشَمْس وْفَيّْ وْأَحلَى وْجُوهْ
إِتْنَقَّلْ مِنْ تُحفِةْ لَ تُحفِةْ وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
مَيِّلْ عَ سُوْق الخُضْرَةْ يَاطِير وْ شُوْفْ
فَرْفَحِيْنَا وْلِسِّيْنِةْ وْحُمِّيْضْ وْلُوْفْ
وْزَعْمَطُوْطْ وْخُبِّيْزِةْ وْزَعْتَرْ بَلاطْ
إِتْنَقَّلْ مِنْ ظُمِّةْ . لَ ظُمِّةْ . وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
يَاطِيرْ اِسْرَحْ وِاتْفَقَّدْ شَجَر الزَّيتونْ
كُوْرْ وْرَامِينْ وْعِلَّارْ وْدِيْرالغصُونْ
سِفَّارِينْ مَعْ قِفِّينْ مَعْ بِيتْ لِيْدْ
إِتْنَقَّلْ مِنْ شَجَرةْ لَ شَجَرةْ وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
كَفْرِيَّاتْ وْشَجَرهَا في أرضِ الخِيْرْ
كُفُرْ عَبُّوشْ وْزِيبادْ اِسْرَحْ يَاطِيرْ
وِاللَّبَدْ مَعْ صُورْ وْرُمَّانْ وْجَمَّالْ
إِتْنَقَّلْ مِنْ شَجَرةْ لَ شَجَرةْ وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
رَفْرِفْ يَاطِيرْ وْرَكِّزْ مَعْ كُلّ دَرِسْ
مُخَيَّمْ طُوْلْكَرْمْ وْمُخَيَّمْ نُوْرْ شَمِسْ
شُوْفْ دْرُوس العِزِّةْ وِدْرُوس الصُّمُودْ
إِتْنَقَّلْ مِنْ حِصَّةْ لَ حِصَّةْ وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
رَفْرِفْ مِنْ عِزبِةْ لَ خِربِةْ يَاطِيرْ وعِيشْ
عَالحَفَاصِيْ وْأبو كايِدْ وْعَلى أبو خْمِيشْ
عِزْبِةِ الجَرَّادْ يَاطِيرْ. وْعِزْبِةِ الطَّيَّاحْ
إِتْنَقَّلْ مِنْ عِزبِةْ ل عِزْبِة وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
الحَيّ الشَّرقِي (الشَّراقَةْ) حَيّ رْجَالْ
وِالجَنُوبِي وِالغَربيْ عِزوِةْ وْأبطَالْ
والشَّمال المَحبِّةْ . وِالوَسَط الخِيرْ
إِتْنَقَّلْ مِنْ عِزِّةْ لَ نَخوِةْ وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
النَّزلِةْ الوُسطَى وْشَرقِيِّةْ وْغَربِيِّةْ
وْنِزْلِةْ أَبُو نَارْ . وْصِيْدَا الكَرْمِيِّةْ
وْفوقْ عِنِبْتَا و كَفَا . وْلا تِحكِي كَفَى
إِتْنَقَّلْ مِنْ شَرْقَا لَ شَامَا وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
عَكَّابِةْ وْنَزْلِةْ عِيسَى وْبَاقَة الشَّرقِيِّةْ
وْعلى بَلْعَا وْشْوِيكِةْ وْ عَالجَارُوشِيِّةْ
عَتِّيلْ وْزِيتَا . المَسْقُوفِةْ وْاكْتَابَا
إِتْنَقَّلْ مِنْ شَامَا لَ شَرْقَا وِانْسَجِمْ
....
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
...
عَلى شُوفِةْ وْعِزبِتهَا وْعَلى ذِنَّابِةْ
والبَلْدِةْ القَدِيمِةْ حِلوِةْ وْجذَّابِةْ
وْارتَاح وْفَرعُونْ . وْعَ جْبَارةْ وِالرَّاسْ
إِتْنَقَّلْ مِنْ غَرْبَا لَ قِبْلِةْ وِانْسَجِمْ
...
صَلِّ عَالهَادِي نَبِينَا وِابْتَسِمْ
يَا هَلا وْحَيَّاك . إِنْتَ بْطولكَرِمْ
طولْكَرِمْ بِالعِين وْبِالقَلِبْ وِالرُّوحْ
إِتْنَقَّلْ مِنْ قَلبِيْ لَعِينِي وِانْسَجِمْ
....
بقلمي : شادي شريف ابوخيط
...
الأغنيات السابقة :
الأغنية الاولى : بلدتي كرم يضاهي الف كرم
الرابط
https://www.palestineremembered.com/GeoPoints/Tulkarm_7935/Article_18733.html
الاغنية الثانية: طولكرم العشق
الرابط
https://www.palestineremembered.com/GeoPoints/Tulkarm_11855/Article_34996.html
الاغنية الثالثة: في شوارع طولكرم
الرابط
https://www.palestineremembered.com/GeoPoints/Tulkarm_11855/Article_35011.html
الأغنية الرابعة: الشتاء الفلسطيني
الرابط
https://www.palestineremembered.com/GeoPoints/Tulkarm_11855/Article_35018.html
الاغنية الخامسة: نسائم الشوق
الرابط
https://www.palestineremembered.com/GeoPoints/Tulkarm_11855/Article_35029.html
...