يالو: مدونة بعنوان (طمنو خيتي بنت القدس الابية)

هاي خيتي بنت القدس الأبية ما كانتش تعرف "يالو" قريتي الصغيرة التي وئدت منذ زمن
بس سمعت عنها من مدونتي في سنة 2010 و هي مدمرة من 10 10 10 10 قبل 2010
و هي من مدن اللطرون يا بنت القدس الابيَّة

طمنوا خيتي بنت القدس الأبيَّة

طمنوا خيتي بنت القدس الأبيَّة بأنه يالو قريتي مثل ما هــــــــيَّ
بعدها مدمرة و مهجورة و بتنزه فيها وحوش البريَّــــــــــــــة
و بَطَّلْ ينعرف إلها ليل من نهار و أحجارها من القهر صارت مهريَّــة
و أشجارها لما تهب ريح الصَّبا أغصانها بتصير ذبلانة و محنيَّــــــــة
و بٍحٍن الشجر لأيام زمان و بتذكر لما كان يلعب حوليها شب و صبيَّة

بس اطمني يا خيتي ........ لساتها مش منسيَّة
عملوها للرحلات يروحوا عن زهقهم فيها لأنها جميلة و بهيَّــــــــــــــة
و سموها اسم حلو كثير ( كندا بارك ) يا خيتي نقوا من الموسوعة العالميَّة
و زمان كان مسموح نتنزه فيها بس اليوم ممنوع بقولوا لأبد الأبديَّــــة
خايفين هم يا خيتي نسرق من ثمار أشجارها الشهية العليَّــــــــــــــة
الهم حق يا خيتي لأنها ما في مثلها و لا في الأساطير محكيَّـــــــــــــــــة
مش بس قريتي حلوة يا خيتي كل الوطن و المجرة الكونيَّـــــــــــــــــة

بس اطمني يا خيتي ...........
سمعت خبر حلو كثير رح يحددوا موقعها عبر الأقمار الصناعيَّــــة
مهم زرعوا الأقمار عشان يصوروا كل شيء في كل الكرة الأرضيَّة
و رح يصوروها مش صورة وحدة عدة صور فوتوغرافيـَّــــــــة
و يدخلوها في الحاسوب على شبكة الانترنت العالميــَّـــــــــة
و يرسلوها بالبريد يا خيتي رسالة الكترونيـــَّــــــــــــة

بحيي الصين أنا يا خيتي و أهلها اللي اخترعوا لنا أجهزة حاسوبيَّـــــــــــة
و عملوا كل شيء يلزمنا يا خيتي حتى البرامج اللازمة لتشغيل القطع الالكترونيَّة
و بتشوفي صورتها يا خيتي و بتشوفي معنى الديمقراطيَّـــــــــــــــــــــــــة
طردونا يا خيتي و قتلوا اللي قتلوا و هدموا البيوت بكل شفافيَّــــــــــة
و لوثوا كل شيء الهواء و النور و الأرض لوثوها بالتلوث عندهم إحترافيَّــــة

بس اطمني يا خيتي ...........
أجدادي الاثنين استشهدوا يا خيتي و كثير من رجال يالو و ما خافوا من المنيَّــة
و أمي حملت صغارها و هربت مش خوف على حالها لأ على صغارها عشان يعيشوا بحريَّة
و هدموا الصهاينة دارها يا خيتي اللي يا دوب سكنتها خمس شهور أو اقل شويَّـة
و بتشوفي كيف الباطل بصير حق يا خيتي و اله مكانة عليَّــــــــــــــــــــة
و كيف الصهاينة الأوغاد المجرمين صاروا مساكين بالمؤتمرات الدوليَّـــــــــــــة
و إحنا لأننا بندافع عن أرضنا و حقنا سمونا منظمات إرهابيــَّـــــــــــــة

بس اطمني يا خيتي .........
الهم الأراضي اللي بحبوها و برغبوها يا خيتي و بوزعوها على بعضهم بحريَّة
و إلنا غبار الأرض بعد ما يجرفوها بالمعدات الآليـَّــــــــــــــــــة
و الهم كل دعم يا خيتي من الدول في كل الكرة الأرضيــَّـــــــــــــــة
و إذا واحد حن قلبه علينا و ودالنا دواء صادروا بكل جنونيَّـــــــة
و قالوا هذا مش دواء يمكن يكون فيه متفجرات الكترونيَّــــــــــــــة
و العالم بتابع عالشاشات القتل و التشريد من جنود الهمجيَّــــــــــة
أكثر ما بعملوا بستنكروا و بشجبوا يا خيتي حتى الدول الأوروبيَّــــــة

معلش يا خيتي ....
هيك الله كتب على هالشعب يناضل و يضحي من اجل القضيَّــــــة
الهم يا خيتي هاي الدنيا و إلنا في الآخرة عند ربنا جنة هنيَّة

رح أقول اللي قالته أخت الشهيــد قَبلـِـــــــــــــــــــي
و بنت القدس ذات الأفكار النورانيَّــــــــــــــــــــــــة
اتحدوا يا عالم و اتركوكوا من الضغينة و العنصريَّـــــــــــة
و كونوا حزب واحد مثل ما خلقنا الله أمة واحدة بالدين عليَّــة
اتركوا التحزب و الأحزاب و كونوا يد واحدة أحسن من التعدديَّة
و خلوا انتمائكم للأقصى و كل المجرة الكونيَّـــــــــــــــــة
و القرآن اللي نزله الله على خير البريَّــــــــــــــــــــــة
سندباد المجرة الكونية/ ابو براء